ما نزل البعد قدرك يا رفيع المقام
صورتك في القلب لا زالت على حالها..




محبتك شوفها لو شفت حالي حطام
كسرت نفسي لها وامتدت اظلالها..




من يوم حط الصبر من فوق ظهري سنام
وأنا ارتكي للحمول بهدي جمالها..




وإن قالت الناس ما بللتس حلم الغمام
ما نمت إلا ودمعي كان همالها..




واليوم طيرت في وجيه الليالي الحمام
واحلامنا وقعت من دون منزالها..




ان قلت لي يا رقيق القلب وين الغرام
حبيت نعمته... ثم حبيت زوالها..




لا صار حبك حلال ..ووصل حبك حرام
وشلون ترقى معاك النفس بإذلالها..




خلاص خلني وخل الجرح فيني ينام
ما عاد يقوى حمول القلب حمالها..




ما قلت غير الكلام اللي عليه الكلام
وإلا امس عقدة لساني ضاع حلالها..




ما يلحق البنت شرهات وعتاب وملام
لا صار ماهي مرتك ومنت رجالها..




وان طاح دمع الوداع وضاع مسك الختام
البعد كلمة وصح لسان من قالها..




هذا وقدرك كبير ولك غلا واحترام
وفرقاك في القلب فال الله ولا فالها..




للحين ما جفت ادموع الغلا والهيام
غلى المحاجر وهم القلب يبرالها..




ذكراك عدن عليه آمال قلبي حيام
يعني حبيبتك ما تعطش على جالها..




إن مت من بعدها تحييك بين العظام
تعيش في قلبها وتعيش في بالها..




وتشوف محبوبتك لا مر 20 عام
تنساك وإلا تنادي ب اسمك عيالها..