دمعي مطر ... وكن
عيني سحابه = ديميةٍ[ن] تنثر مطرها هماليل
يا عين هلي دمعك اللي نشابه = وإسترسلي ياعين صبحك مع الليل
وا قلبي اللي سهم الأقدار صابه = الجرح كايد ما تفيده تحاليل
يا ونتي ونة مضيع ركابه = ماله من الدنيا سواهن محاصيل
وإلا ضعيفٍ[ن] حاربوه القرابه = ردي حظ ودنيته زادت الكيل
من واهجٍ[ن] بالكبد زاد التهابه = يفوح فوح مهيلات المعاميل
على العزيز اللي فقدنا جنابه = اللي بعيني كان هو زهرة الجيل
مني خذاه الموت بأول شبابه = مايعودلي لو الحق الويل بالويل
من عقب ماجد صار وقتي كآبه = فرقاه بي طفت جميع القناديل
وأمه تجر الصوت من حر مابه = على خدوده يجري الدمع ويسيل
الله يعزيها ويجبر صوابه = على فراقه بالليال المقابيل
ودعته اللي ما يخيب الرجا به = سبحانه اللي محصي العدل والميل
يالله طلبتك يا سريع الإجابه = ياللي حميت البيت من صاحب الفيل
ترسل لماجد رحمتك في ترابه = وتجعله ياربي وسيع المداخيل
وليا بعثته في يمينه كتابه = وبجنة الفردوس بأعلى المنازيل
آمنت بالله في خشوع ومهابه = رضيت في حكم القدر دون تعليل
وأيقنت إن العبد لله مآبه = لابد من يومٍ[ن] يجي دون تمهيل
الموت حق وكل نفسٍ[ن] تهابه = والحق حق ولا عن الحق تبديل
جودي بدمعك وإمطري ياسحابه = وإسترسلي ياعين صبحك مع الليل